Веќе извесен период во Неготино се реализира проектот „Уредување на околината на Саат-кула“ кој е со вкупна вредност од 101.630,53 евра. Проектот опфаќа уредување на просторот со хортикултура, поставување на урбана опрема, поставување на детски играчки и реквизити, изведба на паркинг-места за велосипеди и автомобили, како и поставување на електрика, водовод и канализација. Инаку, врз основа на договорот за партнерство и договорот за субвенционирање на проектот WINE-UP-CN2-SO1.3-SC052 од 08.10.2021г. Oпштина Неготино во рамки на проектот „Подобрување на прекугранично винско искуство за локален развој“ со акроним wine-up ја реализира проектната активност „Подобрување на атрактивностите за развој на туризмот преку реализацијата на проектот „Уредување на околината на Саат-кула“ во Неготино. 

 

   Во рамките на празнувањето на Денот на ослободувањето на Неготино - 8ми Ноември, Општина Неготино по 12-ти пат ќе го организира турнирот во табла “Неготино опен 2022”. По пауза од две години овој настан се враќа во програмата и ќе се одржи од 6 до 8 ноември (недела - вторник). Право на учество имаат сите граѓани на општина Неготино, а наградниот фонд за најдобрите учесници на овој турнир ќе изнесува 20.000 денари.
Бројот на учесници на турнирот е ограничен, а пријавувањето за учество се врши на телефонскиот број 076/749-098 кај лицето Костадин Цветков.
Турнирот кој што ќе се одржи во ТИЦ “Желкова куќа”, ќе биде отворен на 6 ноември (недела) во 17.00 часот, кога ќе бидат одиграни првото и второто коло од истиот. Наградите и дипломите на најдобрите учесници ќе им бидат доделени на 8 ноември (вторник), веднаш по завршувањето на турнирот.

 

   Најдоцна до петок, 21 овој месец, до 16,00 часот до архивата на локалната самоуправа можат да се доставуваат предлози со кандидати за добитници на наградата, признанијата и признанието почесен граѓанин на Неготино по повод празникот 8-ми Ноември. Признанијата се доделуваат секоја година како израз на највисоко општинско признание што се доделува за посебни постигнувања во одредени области на поединци и институции од општината. Наградата и признанијата по повод 8-ми Ноември се доделуваат на поединци, претпријатија и други организации, установи, здруженија на граѓани и заедници чии дела, односно резултати во работењето и дејствувањето, придонесле за нивна лична и афирмација на општина Неготино. Право на поднесување на кандидатури за добитници на наградата и признанијата имаат сите заинтересирани граѓани, претпријатија, установи, здруженија, месни заедници и групи граѓани на посебен формулар кој можат да го подигнат во архивата на ОН или да го симнат од општинската веб страница. Пристигнатите предлози најпрво ги разгледува Комисијата за награди и признанија при општинскиот совет, конечната одлука за добитниците ја донесуваат советниците во Советот на општина Неготино, а наградите и признанијата на добитниците ќе им се доделат на свечената седница која ќе се одржи во вторник на 8-ми Ноември -Денот на ослободувањето на нашиот град. 

 

   Денеска како градоначалник на општина Неготино заедно со извршниот директор на Институтот за истражување и анализа на политики „Ромалитико“ од Скопје Елвис Шаќири го потпишавме договорот за соработка со цел за реалиција на проект за изградба на улица во селото Криволак. Имено, општина Неготино во рамки на Програмата за комунални дејности ја има предвидено конкретната комунална услуга и има предвидено буџетски средства за тоа, а „Ромалитико“ преку проект на УСАИД има обезбедено средства  за подобрување на животот на припадните на ромската заедница. Согласно потпишаниот договор, во реализацијата на проектот за изградба на улица во Криволак општина Неготино ќе финансира 60 отсто од вредноста на работите, а „Ромалитико“ ќе финансира 40 отсто од работите. Рокот за реализација на проектот е 6 месеци од потпишувањето на договорот.

 

  Во рамките на одбележувањето на „Неделата на детето“ која трае од 3-ти до 7-ми октомври и се одбележува под мотото „Другаруваме,се радуваме“, на мое големо задоволство денеска  примив група дечиња од клонот „Мајски цвет“ од Неготино заедно со нивните воспитувачки. Од нивна страна бев информиран дека во текот на неделата секој ден се одржуваат различни активности, а денеска денот го искористија за другарување надвор од градинката со посета на локалната самоуправа Неготино и средба со мене како градоначалник. Дечињата ја искористија можноста да ги искажат своите желби да имаат повеќе лулашки, рингишпил, сала за трчање, повеќе паркови и слично. Дечињата по повод „Неделата на детето“ ми доделија пригоден подарок за што им изразувам огромна благодарност.