Општина Неготино без депонии, како предуслов за создавање чиста и здрава животна средина за сегашните и идните генерации – е мотото под кое на неколку локации во општината се одвиваа и ќе се одвиваат активности за расчистување на дивите депонии. Така, деновиве на иницијатива на локалната самоуправа се изврши комплетно расчистување на дивата депонија пред „ воениот мост“ во селото Криволак. Според информациите од стручните служби, притоа се собрани околу 250 м3 смет, шут, градежен амтеријал и друг вид отпад и истиот е транспортиран на градската депонија Бучето. Се апелира до населението да не се фрла отпад на несоодветни места за тоа, каде што впрочем е поставена и сигнализација, бидејќи во спротивно, секој што ќе биде фатен ќе биде санкциониран согласно Законот за управување со отпад.

  Во соработка со Министерството за локална самоуправа, градоначалникот на општина Неготино Горан Стојанов го потпиша Договорот за финансиска поддршка за имплементација на Стратегијата за Ромите. Во таа насока, Министерството на локалната самоуправа Неготино ќе и додели неповратни средства во иснос од 120.118 денари кои се строго наменски за реализација на активности за подобрување на состојбата на Ромите во општина Неготино. Добиените средства општина Неготино ќе ги насочи кон организација на повеќе настани и активности во делот на имплементацијата на Стратегијата на Ромите. Со договорот, општината се обврза да достави извештај до Министерството за локална самоуправа, најдоцна до 30-ти ноември 2022 година.

  Како резултат на обилните врнежи од дожд дојде до зголемување на водостојот на реката Вардар, а тоа пак придонесе на столбовите на мостот да се соберат стебла кои го попречуваат нормалниот тек на реката и можат да придонесат за оштетувања на мостот. За таа цел, општина Неготино ангажираше специјализирана фирма која денеска реализираше активности за одглавување на насобраните стебла со нивно сечење со моторна пила и нивна дислокација на соодветен простор за тоа.