На иницијатива на градоначалникот на општина Неготино Ванчо Апостолов во неговиот кабинет се одржа работен состанок на кој присуствуваа претставници од бизнис-секторот и стручните служби од локалната самоуправа, а на кој тема на разговор беше претстојното одбележување на празникот на лозарите и винарите Свети Трифун. На сите присутни им беше поделена овогодишната програма за одбележување на „Св. Трифун“ која е во предлог-фаза и со која е предвидено манифестацијата „Недела на виното“ да трае од 12 до 15 февруари, со оставена можност до наредниот работен состанок кој е закажан за наредниот понеделник ( 02.02 ) со почеток од 12,00 часот доколку има издржани предлози, истите да бидат вметнати во програмата. На состанокот сите присутни имаа можност да даваат предлози и сугестии со чија реализација традиционалното прославување на Свети Трифун би се подигнало на едно повисоко ниво, што пак ќе придонесе за зголемување на интерсот кај потенцијалните посетители да присуствуваат на оваа традиционална манифестација што се одржува во Неготино. Инаку, годинава празникот се паѓа во неработен ден, сабота, па очекувањата на организаторите се дека присутноста на настанот ќе биде масовна и тоа како од граѓани на нашата општина, така и од гости од други општини од Македонија.

   Кажувања за спасен живот на постара жена во последен момент, раскопани улици, работно ангажирани речиси сите жители на селото, поплавени домови и покуќнина, оштетена канализација, расчистување на дворните површини од кал, механизација на терен. Ова е сликата која ја затекнавме денеска при посетата на селото Војшанци кое вчера претрпе огромни штети од надојдените води на Војшанска река која се излеа од коритото, но и од водите кои доаѓале од околните ридови. Неколку куќи во селото имаат претрпено огромни штети и во нив нема услови за живот, па според кажувањата на нашите соговорници, биле принудени ноќта да ја поминат кај блиски роднини или пријатели. Градоначалникот на општина Неготино Ванчо Апостолов кој и вчера и денеска беше присутен во Војшанци истакна дека на жителите чии куќи претрпеа најголеми оштетувања итно ќе им се додели помош во градежни материјали за да можат да оспособат барем дел од просториите каде што би имале услови за нормален живот, како и помош во механизација. Кога сме кај механизацијата, да кажеме дека на повеќе локации во Војшанци истата е присутна и тоа како онаа ангажирана од локалната самоуправа, така и механизацијата на ЈП Комуналец и на Противпожарната единица Неготино, а во расчистувањето се вклучени и сите жители на Војшанци бидејќи речиси и нема локација во селото каде што нема оштетувања. Најкритична е состојбата и најголеми оштетувања видовме на патот од мостот во центарот на селото до фармата на „Дуброво“, движењето со возила е отежнато, но со механизацијата се изведуваат зафати за санирање на состојбите. Градоначалникот Апостолов истакна дека активностите за санирање на штетите продоллжуваат до длабоко во ноќта, но и во текот на утрешниот ден.

   Градоначалникот на општина Неготино Ванчо Апостолов изјави дека оваа година на територијата на неготинска општина е предвидено да се започне  со реализација на 4 капитални проекти кои се од витално значење за остварување на основната цел – подобрување на условите за живеење на сите граѓани од општина Неготино. Така, по завршувањето на проектот „Хидраулични регулирање на притисокот на водата„ кој ги даде очекуваните резултати преку укинување на дневните и ноќните редукции и обезбедување на 24 часовно континуирано водоснабдување во Неготино, ќе се започне со уште 2 проекта за создавање услови за уште поквалитетно водоснабдување. Еден од нив е реконструкцијата на водоводната мрежа на 15 улици во градот во должина од 8 километри со цел за отстранување на постоечките дефекти и намалување на загубите на вода, а вториот е изградба на 2 нови резервоари за вода и тоа во Пепелиште со капацитет од 150 м3 и во Тимјаник со капацитет од 300 м3, со што покрај решавањето на проблемот со водоснабдувањето во овие две села, дополнителни количини вода ќе се обезбедат и за граѓаните на Неготино. Исто така, оваа година се планира да започне изградбата на станебно-деловен објект, градски пазар и паркинг-простор на местото на руинираната сала ДТВ Партизан, а после долги години се очекува да започнат работите за асвалтирање на патниот правец Горни Дисан – Вешје.