По завршувањето на комплетниот проект за изградба на фекална мрежа од 3 крака со кои се покри целата територија на селото Тремник, а сега е во фаза приклучувањето на месното население на истата, општина Неготино подготвува проект за изградба на „Биолошка прочистителна станица“ во ова неготинско село. Имено, во рамките на проектот „Водоснабдување и одведување на отпадни води“ кој се реализира во соработка и со поддршка од Министерството за транспорт и врски, а е финансиран со средства преку Европската инвестициона банка, општина Неготино започна со подготовка  за реализација на нов проект- изградба на Биолошка прочистителна станица во Тремник од контејнерски тип. Станицата ќе биде лоцирана во селото со влезен капацитет од 240 м3, а вкупната проценета вредност на проектот изнесува 6.143.028 денари.

   „Како градоначалник и како локална самоуправа имавме, имаме и се надевам дека и во иднина ќе продолжи успешната и плодна соработка со Здружението на слепи лица од нашата општина-една од најактивните граѓански организации чие членство и покрај потешкотиите со видот се обидува и успева да организира и учествува на бројни манифестации, независно дали тие се организираат во нашиот град или во други градови во земјава “- истакна градоначалникот на општина Неготино Ванчо Апостолов кој присуствуваше и ги поздрави учесниците на денешната пригодна свеченост во нашиот град со која беше одбележан 15-ти октомври-Денот на белиот стап. Градоначалникот Апостолов додаде дека одредени проблеми кои се јавуваат, во координација со раководството на неготинското Здружение на слепи ги решаваат во „од“, а општината во рамките на своите можности секогаш давала и ќе дава сопствен придонес во организирањето на разни настани и манифестации од страна на Здружението на слепи лица од општина Неготино.

  Градоначалникот на општина Неготино Ванчо Апостолов придружуван од стручни соработници од локалната самоуправа изврши увид на градежните работи кои во моментов се одвиваат на патниот правец од Горни Дисан до Вешје. Станува збор за реализација на првата фаза од овој пат кој целосно ќе се изгради и асвалтира, а во овој период се одвиваат работите на делницата долга 800 метри која се гради со средства од ИПАРД програмата преку Агенцијата за финансиска поддршка на руралниот развој и земјоделието на РМ. Во наредниот период со средства од Светска банка преку ИПА програмата за рурален развој и со средства од проект за прекугранична соработка ќе се пристапи кон изградба на делнициите во должина од 634 и 400 метри, додека со средства од буџетот на општина Неготино ќе се градат 150 метри од патот од Г.Дисан до Вешје.

   Согласно утврдената динамика за работа, веќе неколку денови по ред се одвиваат градежни работи за изградба на патот од Горни Дисан до Вешје. Проектот ќе се реализира во три фази, при што во рамките на активностите од првата фаза се врши изградба на патот во должина од 800 метри со средства обезбедени преку ИПАРД програмата, додека останатите две делници во должина од 634 и 400 метри ќе се рализираат со финансии обезбедени од ИПА преку Светска банка и ИПА проектот за меѓугранична соработка. Во моментов се изведуваат земјени работи за проширување на оваа делница од проектот, по што ќе следуваат и останатите градежни активности за изградба на комплетно нов пат кој Горни Дисан ќе го поврзе со Вешје.

   Ученици од двете основни и средното училиште, претставници на комуналното претпријатие, на јавната администрација, здруженија, екологисти и други заинтересирани граѓани  се вклучија  во акцијата „Македонија без отпад“ која се реализираше на подрачјето на општина Неготино во соработка и координација со Министерството за животна средина и просторно планирање. Акцијата се спроведе со цел за намалување на количините на несоодветно депониран отпад во одредени подрачја, а во Неготино  се расчистуваше подрачјето долж двете главни улици, градскиот пазар и плоштадот, општинската зграда, дворовите на училиштата, просторот околу СРЦ Младост, а екипи на ЈП Комуналец со механизација посебен акцент  ставија  на расчистување на дивата депонија на просторот кај фудбалското игралиште на влезот во Неготино.