Поради безбедносно изведување на планираните вежбовни активности, Командата на Гарнизонот на Армискиот полигон Криволак го известува месното население дека во периодот до 10-ти овој месец (мај) на повеќе реони на полигонот ќе се изведуваат вежбовни боеви активности. Токму затоа, во наведениот период се забранува секакво движење и престој на луѓе, моторни возила и стока во овие реони, како и земање или допирање на неексплодирани проектили или средства кои можат да бидат опасни по животот на граѓаните. Доколку се пронајдат такви средства, потребно е да се известат надлежните од АП Криволак или во најблиската полициска станица. Вежбалиштата на кое ќе се изведуваат боевите гаѓања ќе бидат видно одбележани согласно законските прописи на АРМ, а ќе биде присутно и физичко обезбедување.

  На 10 мај 2019 год. (петок) со почеток од 20.00 часот во НУ Центар за култура “Ацо Ѓорчев” ќе гостува театарот од Соко Бања со познатата театарска претстава “Арсеник и старите тантели”. Претставата е најпопуларната и најизведуваната комедија на американскиот драмски писател Џозеф Кеселринг базирана на црн хумор. Одлична можност за љубителите на театарот да ја проследат оваа урнебесна комедија во изведба на гостите од Р. Србија. Влезот за претставата е 100 денари.

   Од Јавното претпријатие „Комуналец“  ги информираат граѓаните на Неготино и населените места Тимјаник и Дуброво дека во текот на утрешниот ден (петок 03.05) во времето од 10,00 до 13,00 часот ќе има прекин во водоснабдувањето. Прекинот ќе биде поради промена на вентил на муљен испуст на главниот цевковод кон Неготино, а по завршувањето на зафатот, се очекува да дојде до нормализирање на водоснабдувањето.

   Основното општинско училиште „Гоце Делчев“ од Неготино е меѓу 12-те училишта во Република Северна Македонија,  врз основа на поднесената апликација и објавените резултати, во кои ќе се врши реновирање на училишниот простор. Резултатите од повикот за аплицирање се веќе објавени, а изборот е направен во рамките на проектот на УСАИД за меѓуетничка интеграција во образованието, компонента 3-обезбедување стимул на училиштата преку реновирање во тековнава 2019-та година. Од УСАИД изразуваат благодарност до вработените во училиштето и до локалната самоуправа кои напорно работеа на одобрениот апликационен пакет. Директорот на училиштето Петар Мантев истакнува дека со овој проект комплетно ќе се менува стаклениот дел во холот на училиштето од сите страни со поставување на нови алуминиумски прозорци со термопан стакло,што пак ќе придонесе за поголема сигурност и безбедност на учениците и вработените и ќе се заштеди на енергија.