Денеска во работниот клуб на Центарот за вработување во Неготино се одржа вториот отворен ден на Агенцијата за вработување на Република Македонија. Притоа, средба со невработените лица и со работодавачите остварија директорот на Агенцијата Влатко Поповски, градоначалникот на општина Неготино Ванчо Апостолов и директорката на неготинскиот Центар за вработување Кристина Чадамова, а активно учество зедоа и стручните лица од Центарот за вработување. На отворениот ден Поповски, Апостолов и Чадамова ги презентираа активните мерки за вработување кои се актуелни во овој период и услугите на агенцијата, како и со напорите што локалната самоуправа ги прави за создавање услови за отворање нови капацитети. Директорот Поповски информираше дека во тек се повеќе мерки преку чија реализација се очекува да се зголеми бројот на вработените во општина Неготино, директорката Чадамова рече дека најголем интерес има за мерката самовработување преку грант од 3.000 евра во опрема со пријавени 39 невработени лица, додека градоначалникот Апостолов истакна дека е горд што моментално бројката на невработени е на најниско ниво од 2006 година до денес и дека очекува на местото на продадените парцели на 25 хектари во Индустриската зона Неготино да никнат нови производствени капацитети во кои ќе се вработуваат граѓаните од неготинска општина.

   Во рамките на реализацијата на годишната Програма за комунални дејности на општина Неготино во делот на зимското одржување на улици и патишта на територијата на нашата општина, викендов стручни екипи од локалната самоуправа со механизацијата на фирмата избрана за изведување на овој вид работи беа ангажирани на расчистување на наносите од снег на патниот правец Долни Дисан-Горни Дисан-Вешје во должина од 7 километри. Интревенцијата се должи на реакциите на месното население од овој регион кои се соочуваа со проблеми при движењето, по што уследи работната активност од страна на локалната самоуправа. Притоа, исчистен е снеготи долж целиот предходно споменат потег, патот е пробиен и осбособен за нормално одвивање на сообраќајот и движење на локалното население.

  Поплавите кои пред извесен период ја зафатија Македонија на територијата на општина Неготино најголеми штети предизвикаа во селото Војшанци каде што покрај оштетената инфраструктура, настрадаа и дел од домовите на тамошните семејства. Стручна комисија од локалната самоуправа која заедно со градоначалникот Апостолов континуирано беше присутна на терен и одговараше на барањата на население го изготви конечниот извештај кој ќе биде доставен до надлежните државни органи од кои се очекува одобрување помош, а свој придонес при санирањето на штетите ќе даде и општина Неготино. Па така, на над 260 домаќинства погодени од поплавени во  Македонија, меѓу кои и општина Неготино, започнаа да им се исплаќаат средствата за санирање на штетите. Семејствата, во зависност од претрпените штети ќе добијат помош од 14.000 до 110.000 денари, а потребните средства од над 10 милиони денари се дел од средствата собрани од хуманитарните акции што со донации на трите телефонски броја легнаа на солидарната сметка на Црвениот крст на РМ. Притоа, направен е попис на она што е уништено во домовите на семејствата и она што не може да се користи, направени се записници со детална проценка која покажува колку средства му се потребни на секое од семејствата за санирање на штетите. Средствата семејствата треба да ги добијат во текот на наредната недела, а финансии за санирање на штетите од поплавите ќе добијат и 10 семејства од неготинското село Војшанци.

   „Не е важно за колкав временски период е решен еден проблем, не е во прашање ниту висината на финансиските средства потрошени за реализацијата на проектот, најважно од се е дека со спроведувањето на проектот „Хидраулично регулирање на притисокот на водата“ се постигна очекуваниот ефект – после 30 години во кои граѓаните на Неготино се соочуваа со недостиг од вода за пиење укинати се 12 часовните редукциии и обезбедено е континуирано 24 часовно водоснабдување за населението“ – истакна градоначалникот на општина Неготино Ванчо Апостолов на денешната презентација на споменатиот проект од страна на стручни лица од фирмата ИМГД од Хрватска кои во изминатите 3 месеци беа ангажирани на реализацијата на проектот. – Не застануваме овде, додаде Апостолов и додаде дека веќе е потпишан договорот со Светска банка и најверојатно од април ќе започне релаизацијата на проектот за реконструкција на водоводната мрежа на улици во Неготино во должина од 8 километри, планирана е изградба на 2 нови резервоари за обезбедување дополнителни количини вода за пиење, се поставуваат водомери онаму каде што досега ги немаше, со еден збор се спроведуваат активности со кои за неготинци ќе се обезбеди редовно водоснабдување во наредните 100 години.