Градоначалникот на општина Неготино Тони Делков деновиве имаше интензивни контакти со странски претставници, меѓу кои амбасадори, потенцијални инвеститори и заинтересирани за спроведување заеднички проекти со нашата општина. Така, денеска градоначалникот Делков го прими и разговараше со Паоло Вигато од Италија од општина Есте и Монтањина-провинција Падова Венето. Целта на состанокот беше воспоставување соработка и аплицирање на заеднички проекти од интерес за двете општини од областа на земјоделието и животната средина. Двајцата соговорници беа едногласни дека и двете општини имаат огромни потенцијали за спроведување проекти од овие области, па се договорија на наредниот состанок соработката да продолжи на ниво на администрација преку заедничко разработување на проекти.

   На барање на љубителите на театарот од Неготино, комедијата “Стјуардеси” на кавадаречкиот театар наредната недела ќе доживее репризно издание во Центарот за култура “Ацо Ѓорчев”. Поради огромниот интерес за оваа театарска претстава во нашиот град за премиерната изведба и после неа, општина Неготино и Центарот за култура “Ацо Ѓорчев” направија напори по вторпат да ги видиме одличните актери на кавадаречкиот театар со извонредната изведба на оваа комедија, која што е работена според текст на Марк Камолети, а е во режија на Диме Коцевски.

Претставата е закажана за вторник, 24 април со почеток од 19.30 часот, а влезниците по цена од 50 денари можат да се набават пред почетокот на претставата на билетарата во Центарот за култура “Ацо Ѓорчев”.

  Претставници на фирмата Холдз консалтинг од Република Словачка заинтересирани да инвестираат во отворање сопствен бизнис на подрачјето на нашата општина, денеска остварија работна средба со градоначалникот на општина Неготино Тони Делков. Домаќинот на средбата, градоначалникот Делков, ги запозна гостите со личната карта на градот, со реалните проекти во општината во кои може да се инвестира, потенцирајќи ја притоа одличната местоположба на општина Неготино со патна и железничка инфраструктура во близина. Исто така, градоначалникот Делков ги запозна потенцијалните инвеститори од Словачка и со постоењето на 2 веќе подготвени за продажба индустриски зони со градежни парцели, како и други локации во општината за кои веќе е изработена целосна планска документација. Претставниците од Холдз консалтинг изразија задоволство од добиените информации и потенцираа дека во блиска иднина ќе остварат уште една работна посета на општина Неготино.

   Неговата Екселенција амбасадорот на Република Унгарија во Република Македонија д-р Ласло Дукс  денеска оствари работна посета на нашиот град остварувајќи притоа средба со градоначалникот на општина Неготино Тони Делков и неговите соработници. Средбата доаѓа како резултат на интензивирани активности на меѓународно ниво на градоначалникот Делков и остварување средби со претставници на амбасадите во нашата држава. На денешната средба од страна на неготинскиот градоначалник беше потенцирана одличната соработка со амбасадата на Унгарија која резултираше со добивање на 100 канти за отпадоци за потребите на граѓаните на општина Неготино кои се очекува да придонесат за подобрување на комуналната хигиена во градот и населените места, а стана збор и за потенцијалните можности за продлабочување на соработката и на економски план. Ова од причина што општина Неготино е збратимена со унгарската општина Наѓиката со која се остварува одлична соработка на повеќе нивоа и која ќе продолжи и во иднина. Инаку, во текот на наредните денови најавено е остварување работна средба на градоначалникот Делков со претставници на амбасадата на Република Словачка во Република Македонија.