Во рамките на реализацијата на проектот „Мојот убав град“ инициран од градоначалникот на општина Неготино Тони Делков, деновиве на повеќе локации во градот и дел од населените места беа спроведени зафати за поставување на урбана опрема и оплеменување на околниот простор. Така, урбана опрема и нови реквизити се поставени во паркот на ул„Фемо Кулаков“ лоциран на десната страна од патот кон Тимјаник, а на тој простор извршено е и реновирање на дел од постоечките елементи со нивно враќање во првобитната состојба со создадена можност за нивно користење од месното население. Урбана опрема и реквизити се поставени и во дворот на Оснвното општинско училиште „Гоце Делчев“, со тоа што директорот Петар Мантев најавува реализација и на многу други проекти кои ќе придонесат за разубавување на овој простор. Зафати се изведени и во подрачното училиште во Пепелиште каде што се работеше на санирање на оградата на училишниот двор, а паралелно се реализираат активности и на други локации. Градоначалникот Делков изјави дека активностите од проектот „Мојот убав град“ ќе се одвиваат во континуитет за времетраењето на неговиот мандат.

  По повод 20-ти мај Денот на пожарникарите секретарот на општина Неготино Ивица Златковиќ ги посети и им упати честитки на припадниците на Противпожарната единица во Неготино. „Работата на пожарникарите е исклучително одговорна и ни малку лесна бидејќи вие несебично се изложувате на тешки и опасни ситуации и неретко во опасност ги ставате и вашите животи за да ги заштитите животите на граѓани и нивните имоти. Но, и покрај опасностите, да се биде пожарникар е хумана и пожртвувана работа, а вашата организираност и професионалност се од драгоцена важност при дејствувањето во пожари и други непогодности“-истакна секретарот Златковиќ. Командирот на неготинските пожарникари Иле Илиев додаде дека со максимална одгворност, посветеност и ангажираност ги реализираат поставените задачи во текот на цела година, покажувајќи ја на дело посветеноста кон оваа хумана професија, а се со цел секогаш и во секое време да им се излезе во пресрет на граѓаните и нивните потреби. На денешната свеченост по повод Денот на пожарникарите посета реализираа дечиња од Детската градинка „Фемо Кулаков“ од нашиот град кои се запознаа со механизацијата и алатите неопходни за интервенција на пожарникарите и како треба да реагираат и на кој број (193) треба да се јават сите кои ќе забележат пожар.

  Музичкиот дует „Грациозо“ неодамна третпат настапи во Мароко и ја претстави нашата земја на музички фестивал на кој учествуваа уметници од целиот свет. Станува збор за концерт што се одржа во рамките на фестивалот „Мдик Мозаик“ во мароканскиот град Ринкон. Ова беше прво издание на фестивалот, на кој учествуваа околу 200 уметници, групи, танчари и игроорци од целиот свет. Имаше учесници од Шпанија, Италија, Бугарија, Гвинеjа-Бисао, Велика Британија, Македонија и други држави. Манифестацијата беше под покровителство на гувернерот на Ринкон, а меѓу почесните гости на настапите беше и една од принцезите на кралството Мароко, како и гувернери, министри и други значајни личности од економската, културната и музичката фела. Дуетот „Грациозо“, што го сочинуваат Невенка Дуковска – пијано и Кристина Палија – сопран, овој пат доби и плакета, врачена лично од гувернерот, за нивниот придонес во развојот и збогатувањето на музичката култура и придонес во меѓународната соработка меѓу нашите две држави. Би сакала да му се заблагодарам на градоначалникот на општината Неготино Тони Делков, кој ни даде поддршка да ја претставуваме нашата земја на сцените во Мароко. Оваа година ние се претставивме исклучиво со класична музика, со познатите сопрански арии на Пучини, Верди, Хендл, Шуберт и други. Искрено, бевме пријатно изненадени од реакциите на публиката, која со големо внимание го проследи целиот наш настап, кој за нив навистина беше реткост, бидејќи во Мароко пред сѐ се негува и слуша тамошната ориентална музика, додека класичната музика е помалку застапена – вели сопранистката Кристина Палија. Таа дополни дека свечена церемонија се одржала пред претставници од кралската фамилија на Мароко, меѓу кои била и една од принцезите на династијата и гувернери, кои се директни застапници на кралот Мухамед Шести, кои дојдоа од Рабат, Казабланка, Тетуан, Ринкон и од Мдик каде што се одржуваше фестивалот. Гостин во програмата беше и Александра Трајкова (пијано), професорка во ДМУЦ „Сергеј Михајлов“ – Штип, чиј настап исто така беше проследен со неверојатни овации од срдечната и многубројна публика.
Дуетот „Грациозо“ наскоро го очекува и настап во Шпанија, а во октомври и во декември добија покана повторно да гостуваат во Мароко.

   По 8-ми пат во организација на општина Неготино и Средното општинско училиште „Св. Кирил и Методиј“ на градскиот плоштад во нашиот град се одржа традиционалната манифестација „Матурски бал-Неготино 2018г“ на која пред присутните во ритамот на танцот „квадрил“ танцуваа неготинските матуранти. Манифестацијата за отворена ја прогласи секретарот на општина Неготино Ивица Златковиќ кој во негово и во име на градоначалникот на општина Неготино Тони Делков на матурантите им порача дека со самиот чин на матурирање тие стануваат возрасни луѓе свесни за својата одговорност и од денеска тргнуваат по нови животни патеки со што завршува една значајна фаза од нивниот живот на која секогаш ќе се сеќаваат. Секретарот Златковиќ во пригодното обраќање изрази убедување и надеж дека најголемиот дел од матурантите ќе го продолжат образованието на една од високообразовните установи во РМ и на тој начин ќе создадат услови за надградба на нивните знаења кои ќе им бидат од голема корист при реализирањето на нивните идни работни и животни кариери. Веднаш потоа, стотици неготински матуранти го одиграа танцот „квадрил“.