Неговата Екселенција амбасадорот на Соединетите Американски Држави во Република Македонија Џес Бејли придружуван од членови на неговиот кабинет оствари работна посета на општина Неготино. За време престојот во нашиот град амбасадорот Бејли се задржа во краток разговор со градоначалникот на општина Неготино Тони Делков со кого разговараше на теми поврзани со функционирањето на локалната самоуправа и проектите што општината ги реализира за подобрување на условите за живот на сите граѓани на неготинска општина.

   Со одигрувањето на финалниот натпревар помеѓу екипите на „Пицерија Ема“ од нашиот град и „Партизан“ од Гевгелија кој изобилуваше со квалитетна кошарка и голема незивесност околу победникот, заврши 11-тото издание на турнирот во улична кошарка „Неготино 2018“ на кој првото место го освои неготинската екипа. Наградите во форма на пехари, дипломи, медаљи и парични средства кои ги обезбеди организаторот на најуспешните им ги врачи секретарот на општина Неготино Ивица Златковиќ кој во своето обраќање пред многубројната публика која во изминатите три дена беше присутна на градскиот плоштад истакна дека натпреварувањето поминало во најдобар ред, прикажана е квалитетна кошарка, додавајќи дека радува фактот што секоја година се зголемува бројот на учесници како од нашата, така и од други општини, со надеж дека од година ќе бидеме сведоци на уште поквалитетен турнир во улична кошарка. Златковиќ награди и признанија им врачи и на најдобрите во јуниорска и поединечна конкуренција, а турнирот заврши со одржување на натпреварување во шутирање тројки.

   Првиот човек на македонската полиција- министерот за внатрешни работи Оливер Спасовски придружуван од директорот на Бирото за јавна безбедност Сашо Тасевски денеска оствари работна посета на Неготино при што ја посети Полициската станица во нашиот град и оствари средба и се задржа во разговор со градоначалникот на општина Неготино Тони Делков. „Разговаравме за безбедносната состојба на подрачјето на Полициската станица Неготино и заклучивме дека истата е стабилна, а  со  колегите  од ПС Неготино разговаравме за реализацијата на тековни и планирани активности и подобрување на условите за работа“- потенцираше министерот Спасовски по посетата на неготинската полиција. Министерот додаде дека овој концепт на работа на МВР има за цел директно присуство на терен во градовите во земјава и средби со граѓаните за обезбедување поголема безбедност и враќање на довербата од граѓаните кон полицијата. За време посетата на градот, во просториите на локалната самоуправа министерот Спасовски оствари средба и со градоначалникот на општина Неготино Тони Делков  на која разговараа за прашања кои се од заеднички интерес на полицијата и локалната самоуправа, пред се во делот на сообраќајот и зачувувањето на јавниот ред и мир на подрачјето на неготинска општина. Министерот за внатрешни работи Спасовски потенцираше дека градоначалникот Делков го запознал се тековните и планираните проекти кои локалната самоуправа ги спроведува, на што Спасовски во функцијата на потпретседател на Владата на РМ вети поддршка за нивна реализација со единствена цел за подобрување на условите за живеење во општината. Двајцата соговорници безбедносната состојба на територијата на општина Неготино ја оценија како стабилна, забележано е опаѓање на криминалитетот и зголемен е бројот на решени предмети.