Со цел за придонесување за зголемување на безбедноста на сите учесници во сообраќајот, како на моторизираните граѓани, така и на пешаците, општина Неготино започна со одбележување на хоризонталната сигнализација на повеќе локации во градот. Според однапред утврдената динамика, одбележувањето се врши на двете главни улици во градот „Маршал Тито“ и „Партизанска“, потоа на улиците „Борис Кидрич“ и „Фемо Кулаков“, пред училиштата и градинките, во централното градско подрачје и на други локации каде што постојат раскрсници. Се апелира до моторизираните граѓани за внимателно возење и почитување на поставените значи при одбележувањето на хоризонталната сигнализација, со напомена дека одбележувањето на хоризонталната сигнализација на двете главни улици ќе се врши во текот на ноќните часови кога и фреквенцијата на возила и пешаци е помала.

   На иницијатива на раководството на клубот на пензионери-хуманисти „Анри Динан“ при Црвен крст Неготино, а со поддршка на градоначалникот Тони Делков и ЈП„Комуналец“, денеска поголема група пензионери реализираше акција за чистење на делови од градот. Акцијата ја спроведоа членови на клубот преку чистење на јавни површини, повеќе улици и тротоари, со цел, како што истакнаа од иницијативниот одбор, како што сакаме дома почисти дворови, така сакаме да имаме и почисти јавни површини со посебен акцент на чистотата во централното градско подрачје, маркетите и производствените погони. Како што истакнаа учесниците во акцијата, со оваа скромна активност целта е да се поттике вклучување во вакви и слични акции на сите категории граѓани кои живеат во Неготино, пред се помладите генерации, училиштата, културните институции и други, а со тоа самите да придонесеме да имаме почист град и да живееме и егзистираме во почиста животна средина.

   Отстранета е и повеќе не постои зградата каде што беше лоцирана салата на ДТВ„Партизан“ во нашиот град, простор кој со години беше запуштен и ја нагрдуваше сликата  во централното градско подорачје. На тој простор приватен инвеститор гради станбено-деловен простор со чија изградба овој дел од градот ќе добие сосема нов и модерен лик.

  Во организација на боречкиот клуб “Неготино” и општина Неготино годинава во салата на СОУ “Св.Кирил и Методиј” се одржа седмото по ред издание на меморијалниот турнир во борење слободен стил “Јован Димитров”. Во рамките на програмата во 10 часот беше положено свежо цвеќе на споменикот на трагично загинатиот наш сограѓанин Јован Димитров во војната на поранешните југословенски простори, а од 11 часот започнаа борбите на турнирот на кој учество зедоа преку 80 млади борачи во следните конкуренции: машки – помлади пионери и пионери и женска конкуренција од боречките клубови: домаќинот БК “Неготино”, “Лирија”  и “Тефејуз” од Скопје, “Бучим” од Радовиш, “7ми Мај-Леов” од Прилеп, “Олимпија” и “Балканец” од Штип и “Борец” од Велес.