ИПА проектот со акроним „wa-mbrella“ опфаќа изградба на главен колектор за отпадни води за приклучување на Тимјаник цо системот за отпадни води на Неготино во должина од околу 2.000 метри, подготовка на техничка документација за довршување на колекторскиот дел во градот во должина од 400 метри, подготовки на документација за пречистителна станица, како и одржување конференции, инфо-денови со вклучена јавност и завршен настан. Буџетот за општина Неготино е 286.140 евра. За партнерот 4-ЈП„Комуналец“ проектот опфаќа набавка на опрема за одржување на канализациони системи-возило за отпушување јами и канализации и набавка на геофони за детектирање на загубите на вода во водоснабдителниот систем во општина Неготино. Вредноста за ЈП„Комуналец“ е 195.338 евра. Со проектот „Енергетска ефикасност во прекугранична област како индикативен фактор на политиката за животна средина „ЕНПОЛ-ЕЕ“ се предвидува замена на 1.400 светилки со енергетски ефикасни ( 1.110 во градот и 300 во населените места) и 45 мерни броила. Планирани се интервенции во 15 простории во општинската зграда за подобрување на енергетската ефикасност. Вредноста на проектот за општина Неготино е 315.979 евра.

   Руинираната зграда на салата на ДТВ„Партизан“ која долги години го нагрдуваше просторот на тој дел од градот и претставуваше потенцијална опасност за минувачите, повеќе не постои. Имено, преку приватна иницијатива на споменатиот простор се гради нов станбено-деловен објект и тоа во најстрогото централно градско подрачје, а се со цел за подобрување на бизнис климата, нови инвестиции и создавање на нов урбан лик на централното градско подрачје.

   После долги години, со изведување на градежни активности, се изврши санација и асфалтирање на главната улица во нашиот град „Маршал Тито“ во должина од 800 метри. Станува збор за санација на потегот од раскрсницата со ул„Никола Петров“ до раскрсницата со ул„29-ти Ноември“ преку замена на коловозната покривка по целата ширина на коловозот од 7 метри, како и замена на оштетениот горен слој со нов асфалт каде што истиот беше оштетен. Вкупната вредност на проектот изнесуваше 6.000.000 денари, средства обезбедени од Буџетот на општина Неготино, а изведувач на работите беше градежната фирма „Градба промет“.

    Со единствена цел за обезбедување соодветни услови  за рекреација, престој и поминување на дел од слободното време, во изминатиот период општина Неготино изврши поставување на нова урбана опрема и детски реквизити во 5 неготински села. Имено, со 650.000 денари реализирана е набавка и монтажа на нова урбана опрема и детски реквизити, како и поправка на постоечките во населените места Д.Дисан, Војшанци, Дуброво и Криволак. Исто така, со средства во висина од 350.000 денари во Пепелиште е ставен во функција новиот забавен парк со изработка на патеки од бехатон коцки, фигури од камења, посадена е трева, цвеќе и засадени се 15 дрвца. Во забавниот парк во Пепелиште поставена е и урбана опрема и тоа 4 клупи за седење, канти за отпадоци и 4 нови детски реквизити.