Она што во 5 обиди предходно не му успеа на неговиот родител Борче, денеска го стори неговиот 15-годишен син Јован Богев. Имено младиот Јован денеска беше најсреќен и од сите учесници успеа да стигне прв и да го фати крстот во осветените води на реката Вардар посакувајќи си многу здравје и среќа во 2019 година. Градоначалникот на општина Неготино Тони Делков на Јован му врачи пригоден подарок, му посака се најдобро, а на сите граѓани на општината им ги честиташе празниците Богојавление-Водици и Јован Крстител со желби за добро здравје, среќа и бериќетна година. Свештеникот од МПЦ Свети Атанасиј на Богев му врачи примерок од Светото писмо и икона, а традиционално лицето кое го фати крстот доби подарок и од покровителот Зегин. Настанот помина во најдобар ред и во присуство на илјадници граѓани на општина Неготино.

   Во текот на вчерашниот и денешниот ден (среда и четврток) на улиците во Неготино беа фрлени 10 тони ризла и 2 тони сол, а од денеска на терен се присутни 2 машини „грејдер“ кои се ангажрани за расчистување на снегот од улиците и патиштата на територијата на општина Неготино. Локалната самоуправа со цел да обезбеди услови за нормално одвивање на сообраќајот, а по новите снежни врнежи во овие два дена, ангажираше работници на локалното комунално претпријатие, екипи на фирмата Коп инженеринг задолжена за зимско одржување на улиците и патиштата и стручни лица од општината кои постојано се присутни на терен, а во овие активности се вклучија и сопствениците на деловни објекти кои извршија расчистување на снегот пред сопствениот простор. Се очекува двете машини „грејдер“ во текот на денешниот ден да извршат расчистување на снегот на улиците и патиштите кои се најкритични за движење на возилата и пешаците, како и патната мрежа која води до установите и институциите кои се најпосетувани од страна на граѓаните на општина Неготино.