Стотина ученици и во 2019-та година зедоа активно учество на традиционалните улични трки во Неготино-настан кој е дел од програма за одбележување на празникот на општина Неготино-8-ми Ноември. Под менторство на своите наставници и професори, ученици од двете основни училишта од градот „Гоце Делчев“ и „Страшо Пинџур“, како и ученици од средното училиште „Св. Кирил и Методиј“ учествуваа во натпреварувањето со цел да остварат што е можно подобар пласман. Присутните на градскиот плоштад, каде што беше и целта, а стартот од кај градскиот Музеј, имаа можност да следат возбудливи и до крај неизвесни трки, во кои победникот се решаваше во последните метри. По завршувањето на трките, следеше чинот на прогласувањето на најуспешните во своите категории, а признанијата и медалите им ги врачи секретарот на општина Неготино Ивица Златковиќ кој на најдобрите им честиташе на постигнатиот успех, а наедно до сите натпреварувачи упати благодарност за учеството на настанот.

  Во рамките на празничната програма која општина Неготино ја организира по повод Денот на градот - 8ми Ноември во Центарот за култура “Ацо Ѓорчев” денес со почеток од 19 часот ќе биде изведена комедијата „Скандал“ во режија на Роберт Ристов и во продукција на „Театар провокација“. “Скандал” е нова провокативна интерактивна претстава на независниот театар “Провокација” во која публиката има задача да го пронајде убиецот на познатата пијанистка Лена Вагнер. Осомничени се сите присутни во фризерскиот салон… Се работи за урнебесна крими-комедија од која се очекува да биде успешна исто колку и претставата „Првин ќе ме земеш, после ќе ме…“ која трета сезона се игра на сцената на Театар Комедија.
Во улогите ќе настапат  Никола Кузелов, Мирјана Поповска-Ристов, Даријан Петров, Јелена Мијатовиќ, Чедомир Митевски, Радо Алексовски. Костимограф е Елена Лука, кореограф – Искра Шукарова.
Овaa театарскa претстава својата премиера ја доживеа на 20 октомври во Театар Комедија, па така граѓаните на Општина Неготино ја имаат привилегијата да ја погледнат веднаш по незината премиера во Скопје. Претставата е финансирана од Општина Неготино.

   Општина Неготино оваа година подготви дводневна богата програма по повод прославaта на 8-ми Ноември - Денот на градот и одбележувањето на 75 години од ослободувањето на Неготино. Настаните ќе бидат организирани на 7ми и 8ми ноември (четврток и петок) на повеќе различни локации, а свечената седница на Советот на општината ќе се одржи во петок - 8 Ноември со почеток од 11.30 часот во кино салата на Центарот за култура “Ацо Ѓорчев” во Неготино.