Чесниот крст кој на Богојавление-Водици беше фрлен во водите на реката Вардар, а лицето што го фати го подари на општина Неготино, на 23 овој месец во времето од 09,00 до 13,00 часот беше изложен на градскиот плоштад во Неготино со цел за негова поголема достапност до населението и за остварување на една хумана цел, собирање финансиски средства за лекување на нашиот сограѓанин Дарко Видони. Во периодот од 4 часа собрани се средства во висина од 14.580 денари кои веднаш по завршувањето на активноста се уплатени на посебната сметка за донации за лекување на Дарко Видони од Неготино. Покрај учеството во оваа хуманитарна активност, општина Неготино преку Советот на општината одобри дополнителни средства наменети за лекување на нашиот сограѓанин Дарко.

   И оваа година во рамките на одбележувањето на празникот на лозарите и винарите „Св.Трифун“ ќе се одржи натпревар во дегустација на вина и ракии произведени од индивидуални производители. За таа цел, организаторот-општина Неготино ги информира сите заинтересирани за учество на натпреварот дека рокот за поднесување мостри од бели и црвени вина и ракии е до понеделник (10.02.2020г.) во времето од 08,00 до 16,00 часот во просториите на локалната самоуправа. Производителите истите можат да ги достават до одговорното лице Дени Трајков на 3-ти спрат во зградата на општина Неготино, а поблиски информации можат да се добијат и на телефонскиот број 078-822-292. Традиционално, и оваа година поднесените мостри ќе бидат дегустирани и оценувани од страна на стручни лица-енолози кои ќе одлучат кои вина и ракии ќе добијат признинија и награди за квалитет. Наградите и признанијата на најдобрите индивидуални производите на домашни вина и ракии градоначалникот на општина Неготино Тони Делков ќе им ги врачи на денот на одржувањето на централниот настан по повод „Св.Трифун“ на 14-ти февруари кој ќе се одржи на градскиот плоштад во Неготино.

   Советот на општина Неготино на последната одржана седница на 24.01.2020 година едногласно донесе одлука За поништување на Одлука бр. 07-875/16 од 16.10.2009 година и поништување на Одлука бр. 08-245/6 од 20.05.2019 година на Совет на општина Неготино. Со поништувањето на овие одлуки, депонија на територијата на општина Неготино нема да се гради.

   Околу 700 метри кубни смет беа собрани деновиве од дивата депонија во близина на армискиот полигон Криволак, активност за расчистување која е дел од програмата за заштита на животната средина на општина Неготино. Изведувач на работите беше фирмата Ас машини чии работници сметот и шутот од околу 700 метри кубни од дивата депонија го кренаа и го дислоцираа на градската депонија „Бучето“ во близина на село Дуброво. Средствата за расчистување на дивата депонија се обезбедени од Буџетот на општина Неготино, а и за тековнава година се предвидени финасии за продолжување со активностите. Од локалната самоуправа апелираат до месното население од Криволак, но и до сите граѓани на општина Неготино, сметот и шутот да го исфрлаат само на градската депонија. Комуналните редари секојдневно се присутни на терен и секој што ќе биде регистриран да фрла смет и шут на несоодветни места за тоа, ќе биде казнет согласно законските прописи.

  Општина Неготино и фирмата Дикор дц дооел од Струмица денеска потпишаа договор за комплетна реконструкција на локалниот патен  правец од Криволак до Пепелиште во должина од 6 километри. Потпишаниот договор е со вредност од 24.762.300 денари. Рокот за изведба на работите на овој патен правец е 150 денови, а во најкраток рок фирмата изведувач ќе биде воведена во работа. Со реализацијата на овој проект ќе се придонесе за зголемена безбедност на сите учесници во сообраќајот кои се движат по локалниот пат Криволак-Пепелиште.