Во тек се активности за реновирање на новиот, просторно далеку поголем од постоечкиот, објект на детската градинка во селото Тремник. Како што информира директорката на градинката „Фемо Кулаков“ од Неготино Нада Најдова, станува збор за реновирање и оспособување за престој на дечиња во простории со поголема површина од досегашната, со што пак ќе се создадат услови за згрижување на сите дечиња од Тремник, без листи за чекање. Исто така, директорката Најдова додава дека од денеска (1-ви август) во функција се ставени новите реновирани занимални во клонот „Мајски цвет“, со што дечињата кои привремено престојуваа во клонот „Темјанушка“ за време траењето на реновирањето, повторно се згрижени во „Мајски цвет“.

  Во Јавната установа за деца – Општинска детска градинка „Фемо Кулаков“ во Неготино, конкретно во клонот „Мајски цвет“, во моментов течат активности за реновирање на занималните во кои што престојуваат децата на возраст од 9 месеци до 3 години. Покрај занималните, се реновира и ходникот во овој дел на градинката. Додека течат работите, децата од овие групи се сместени и престојуваат во објектот „Темјанушка“, се додека просториите во „Мајски цвет“ не се прилагодат за нивно враќање и престој во истите.

  Работници на градежното претпријатие Градба промет од Кавадарци со асистенција на претставници на стручните служби на општина Неготино од денеска започнаа со активности за санација на ударните дупки на улиците во Неготино. Ќе бидат опфатени сите улици на кои се регистрирани оштетувања, а ќе се постапува и по пријавите од граѓани на Моја патрола. Активностите започнаа со гребење на асфалтот на улиците на кои има ударни дупки, по што следува нивно асфалтирање. Се очекува овие активности да се одвиваат во наредните 15 денови.