Во рамки на спроведувањето на годишната Програма за уредување на градежното земјиште на подрачјето на општина Неготино, работници на градежното претпријатие Градба промет ги изведоа финалните работи во делот на асфалтирањето на улицата која ги спојува двата дела од градот и  мостот на Тимјаничка река. Притоа, извршено е асфалтирање на улицата пред и после мостот во должина од над 100 метри, како и асфалтирање на самиот мост. За изведување на комплетните работи околу изградбата на мостото и спроведувањето на асфалтерските работи од Буџетот на општина Неготино беа издвоени средства во висина од 10 милиони денари. Се очекува, со ставањето на мостот и на улицата во функција да се зголеми фреквентноста на оваа обиколница околу градот, со што пак би требало да дојде до растеретување на сообраќајниот метеж во централното градско подрачје.

  Одличен успех на младиот неготинец Димитар Ѓорѓиев на штотуку завршеното Европско првенство во кик – бокс што се одржа во Букурешт – Република Романија. Во исклучително силна конкуренција, во категоријата до 74 килограми Ѓорѓиев го освои второто место со што стана европски вице – првак во оваа категорија. Ѓорѓиев не и непознат на пошироката спортска јавност во Македонија, бидејќи тој е и актуелен светски првак во категоријата до 71 килограм од последното Светско првенство во кик – бокс. По повод постигнатиот спортски успех, тој беше примен од градоначалникот на општина Неготино Пане Трајков кој му честиташе на постигнатите резултати, а Ѓорѓиев се заблагодари на континуираната поддршка што за своите настапи ја добива од локалната самоуправа.