Со доделувањето на новогодишни пакетчиња, градоначаланикот на општина Неготино Ванчо Апостолов денеска ги направи среќни и измиами насмевки и благодарност од голем број дечиња од подрачјето на неготинска општина. Имено, Апостолов најпрво го посети Дневниот центар за лица со ментален хендикеп Порака каде што на сите штитеници им додели пакетчиња, на што во знак на благодарност тие му возвратија со изведување на пригодна програма. Посебно весела беше атмосферата во детската градинка Фемо Кулаков каде на одушевување на дечињата и нивните родители беше изведена претставата „Мапет шоу“ од страна на воспитниот кадар, при што за цело време се пееше и танцуваше, а присутните уживаа во претставата. Оваа прилика градоначалникот Апостолов ја искористи да им додели новогодишни пакетчиња на околу 450 дечиња кои престојуваат во двата клона во градинката, како и на дечињата од игралните во руралните средини Пепелиште, Тремник и Криволак. Исто така, новодогишни пакетчиња добија и дечињата на самохрани родители од општина Неготино, како и децата на членовите на Здружението на слепи лица.

  Во духот на веќе востановената традиција, општина Неготино и оваа година организира заеднички дочек на Новата 2015 година на градскиот плоштад во нашиот град. За забавата на сите присутни кои ќе решат Новата година да ја дочекаат на неготинскиот плоштад во друштво на најблиските роднини и пријатели, ќе се погрижат атрактивната пеачка Руса Андова заедно со членовите на групата Анигона-бенд со настап во живо- комбинација која гарантира добра забава и весела атмосфера. На полноќ е предвиден спектакуларен огномет, по што ќе следува новогодишно обраќање на градоначалникот на општина Неготино Ванчо Апостолов кој прв ќе им ја честита Новата година на присутните на плоштадот. Од локалната самоуправа Неготино упатуваа покана до сите граѓани да повелат и да бидат дел од заедничкиот дочек на Новата 2015 година на градскиот плоштад во Неготино.

    „Функционирањето на 7-те детски игрални во руралните средини во неготинска општина се покажа како доста успешен проект и токму затоа локалната самоуправа со средства од општинскиот Буџет ќе продолжи со финансирање на нивното работење „ – истакна градоначалникот на општина Неготино Ванчо Апостолов кој оствари работна посета на 4 игрални лоцирани во селата Долни Дисан, Тимјаник, Војшанци и Црвени Брегови. Оваа прилика првиот човек на општината ја искористи на дечињата кои престојуваат во игралните да им додели новогодишни пакетчиња и да им посака среќна Нова година, а тие пак во знак на благодарност тие изведоа богата културно-уметничка програма. Што се однесува до дечињата од останатите 3 игрални кои функционираат во Тремник, Пепелиште и Криволак, тие новогодишните пакетчиња ќе ги добија заедно се дечињата од двата клона на градинката Фемо Кулаков на пригодната свеченост која ќе се одржи во вторник.

    Во рамките на реализацијата на неколкуте паралелни проекти за подобрување на водоснабдувањето на подрачјето на неготинска општина, градоначалникот на општина Неготино Ванчо Апостолов и официјално стави потпис на договорот со Светската банка со која оваа финансиска институција на нашата општина и одобри кредитни средства во висина од близу 1.000.000 евра. Според зборовите на Апостолов овие средства ќе бидат употребени за реализација на 2 проекти и тоа реконструкција на водоводната мрежа во должина од 8 километри на вкупно 15 улици во Неготино каде што се регситрирани најголеми загуби на водата за пиење, а наедно ќе се гради и нов резервоар за обезбедување дополнителни количини вода за населението од цела општина. Инаку, локалната самоуправа има изготвено и проект и со истиот до Светска банка ќе аплицира за добивање грант-средства за комплетна реконструкција на патот од Г.Дисан до Вешје.

   „Новото лето и Христовото рожденство нека Ви донесат здравје, среќа и бериќет„ – се вели меѓу другото во Новогодишната и Божиќната честитка од поглаварот на Македонската православна црква – Архиепископот Охридски и Македонски г.г Стефан упатена до градоначалникот на општина Неготино Ванчо Апостолов и до сите граѓани на општина Неготино. „ Синот Божји, Господ Исус Христос, како Богочовек дојде во светот за да не направи синови Божји, за да ни даде можност преку верата и добрите дела да го осмилсуваме својот живот. Божик – празникот на мирот и радоста нека ни ја засили верата, па живејќи по заповедите и законите Божји- да се удостоиме со средба со вечниот Богомладенец. Христос се роди ! Честитот и од Бога благословено Новото Лето !

                                                                                               АРХИЕПИСКОП ОХРИДСКИ И МАКЕДОНСКИ

                                                                                                          ГОСПОДИН, ГОСПОДИН СТЕФАН