Цели 55 години вработените и раководните тимови ги остваруваат поставените цели за афирмација на предучилишното воспитание и образование во општина Неготино, грижата за децата, сето тоа проследено со детска смеа, радост и среќа – беше истакнато на пригодната свеченост со која се одбележаа 55 години од започнувањето со работа на детската градинка „Фемо Кулаков“ од Неготино. Неготинската градинка претставала и претставува средина со најдобри услови за престој на деца, со средства и примери за развој на предучилишното дете и со реализација на многубројни и разновидни и осмислени активности кои придонесуваат за поттикнување на индивуалните способности и потенцијали на децата. Инаку, денеска установата ја сочинуваат 66 вработени распоредени во 2 објекта во градот и 3 во руралните средини кои се грижат за 400 предучилишни деца.

   Во рамките на одбележувањето на 112-годишнината од загинувањето на еден од најголемите македонски револуционери Гоце Делчев, денеска и во изминатите денови во Неготино се реализираа бројни активности за одбележување на овој светол датум, а централен настан беше патрониот празник на Основното општинско училиште „Гоце Делчев“ од нашиот град и подрачните училишта кои делуваат во негов состав. Присутните ученици, наставници, просветни работници, претставници на локалната самоуправа и други гости ги поздрави директорката на училиштето Весна Јованова која во своето пригодно обраќање се осврна на едногодишното работење на училиштето, постигнатите резултати и проектите кои се во тек или допрва треба да се реализираат со единствена цел за овозможување најдобри услови за школување за учениците кои наставата ја посетуваат во ООУ „Гоце Делчев“. За сите кои присуствуваа на одбележувањето на патрониот празник беше изведена богата културно уметничка програма, а на учениците кои освоиле награди на разни натпреварувања, им беа доделени скромни подароци.

   Во организација на Општинскиот совет за безбедност на сообраќајот на патиштата и со поддршка на општина Неготино традиционално како и секоја, така и оваа година, се одржа општинскиот натпревар „Детски семафор – 2015“ – настан кој е дел од годишната Програма за работа на ОСБСП. Како што информираше општинскиот иснпектор по сообраќај Ирена Зорзиќ, на натпреварот учествувале ученици од двете основни општински училишта „Гоце Делчев“ и „Страшо Пинџур“ од петто до деветто оделение кои се натпреварувале во теоретски и пракктичен дел. Натпреварот се одржа во просториите на ООУ „Страшо Пинџур“, а најдорбите, односно првонаградените ќе земат учество на регионалниот натпревар „Детски семафор“ кој ќе се одржи во Велес.