Во весела и празнична атмосфера голем број граѓани на општина Неготино Новата 2016-та година ја дочекаа на градскиот плоштад во Неготино каде што организираниот дочек го организираше локалната самоуправа, а за забавата се погрижија членовите на групата Антигона-бенд. Ниту студеното време и ниските температури кои се спуштија неколку степени под нулата не ги спречија нашите сограѓани да излезат на плоштадот и заеднички да ја испратат старата 2015 и да ја дочекаат новата 2016 година. Точно на полноќ кога стрелките на часовникот се поклопија и беше означено доаѓањето на Новата година следуваше спектакуларен огномет и традиционалното обраќање на градоначалникот на општина Неготино Ванчо Апостолов кој на присутните сограѓани им ја честиташе Новата година со желби за добро здравје, многу среќа и успех на личен и професионален план. Предходно, неколку часови пред полноќ, градоначалникот Апостолов ги посети вработените во установите кои се грижат за здравјето и безбедноста на граѓаните на општина Неготино и тоа Полициската станица, Противпожарната единица и Здравствениот дом во нашиот град посакувајќи им за најлудата ноќ во годината да имаат што е можно помалку работи, а посетата ја искористи на дежурните служби да им подели пригодни подароци.

   Почитувани граѓани на општина Неготино !
Во пресрет на одбележувањето на новогодишните и божикните празници би сакал од мое лично име и од име на општина Неготино на сите вас од се срце да ви посакам се најдобро во новата 2016 година !
Ви посакувам да имате здравје и среќа, да ви се остварат малите и големите желби, да зрачите од ведрина и оптимизам, да имате убави мисли и да ви се остварат вашите соништа, да бидете опкружени со за вас драги личности и да имате мир, благосостојба и успех на личен и на професионален план !
Како прв човек на локалната самоуправа, а со цел за подобрување на условите за живеење на сите граѓани на општина Неготино, посакувам навреме да ја завршиме реконструкцијата на водоводната мрежа во градот и изградбата на два нови резрвоари за вода и конечно долгорочно да го надминеме проблемот со недостигот од вода за пиење, а нашите сограѓани веќе престојното лето да имаат 24 часовно континуирано водоснабдување !
Посакувам завршување на изградбата и реконструкцијата на неколку значајни патни правци на територијата на нашата општина, изградба на стопански капацитети во индустриската зона неготино и отворање нови работни места за неготинци, започнување на процесот на гасификација на општина Неготино и реализација на голем број започнати проекти и оние кои допрва треба да почнеме да ги реализираме !
Накратко, посакувам сите ние-граѓаните на општина Неготино да живееме во една просперитетна општина која ќе ги овозможи сите услови за напредок во повеќе сфери од нашето живеење !
На крајот, на сите граѓани на општина Неготино им ги честитам Новогодишните и Божикните празници и им посакувам се најдобро во новата 2016 година !

    Традиционално, како и секоја, така и оваа година во Детската градинка „Фемо Кулаков“ во Неготино која е со целосно исполнет капацитет и се бара место повеќе за престој на нови дечиња, се одржа традиционалната новогодишна забава  во чија изведба учествуваа дел од дечињата кои престојуваат во оваа воспитно-образовна установа, претставници на Советот на родители, воспитувачки и други претставници на градинката. Весело и разиграно беше во текот на времетраењето на целата претстава на задоволство на сите присутни кои имаа можност да ја проследат истата, а меѓу гостите беше и градоначалникот на општина Неготино Ванчо Апостолов кој за сите 390 дечиња обезбеди новогодишни пакетчиња кои Дедо Мраз ќе им ги подели на дечињата кои престојуваат во градинката. Директорката Весна Нацева на сите кои дадоа придонес во подготовката и реализацијата на претставата им упати јавна благодарност, а градоначалникот Апостолов истакна дека уживал во прекрасната претстава во изведба на нашите најмлади сограѓани.

   Продолжува успешната низа настапи на нашите млади сограѓани-шахисти Ана Петрова и Тони Лазов кои со своите извонредни познавања на оваа древна игра слободно можеме да кажеме станаа „претплатени“ на освојување на медалји и трофеи на локално, државно и меѓународно ниво. Имено, на деновиве одржаното Државно првенство во шах за средношколци во машка и женска конкуренција Тони и Ана уште еднаш на шаховската табла го демонстрираа раскошниот талент и знаење кое го имаат, при што во машка конкуренција Тони Лазов со 5,5 освоени поени од 6 мечеви го освои првото место и златниот медал, додека во женска конкуренција Ана Петрова беше второпласирана и носител на сребрен медал. Денеска прием за Ана и Тони организираше градоначалникот на општина Неготино Ванчо Апостолов кој средбата ја искористи да им честита на одличниот успех, да каже дека е горд на континуираните успеси на двајцата млади шахисти кои на овој начин, покрај за сопствената, придонесуваат и за афирмација и на општина Неготино, додавајќи дека тие и останатите млади, талентирани и успешни спортисти од нашата општина ја имале и секогаш ќе ја имаат неговата и поддршката на локалната самоуправа.

   „Подготвителни работи на терен за реконструкција на водоснабдителниот систем на улици во Неготино во должина од 8 километри-проект на општина Неготино вреден 38.000.000 денари  се одвиваат според однапред утврдената динамика и критериумите на Светска банка“-констатираа при извршениот увид на терен претставниците на Светска банка, градоначалникот на општина Неготино Ванчо Апостолов и надзорите н СБ и општина Неготино. Притоа, на терен беа посетени улиците Ило Виларов и Енегелсова на кои веќе извесен период активно течат подготвителните теренски работи и од страна на сите присутните беше искажано задоволство од досегашниот тек на изведувањето на работите, со оптимистички очекувања дека временските услови му одат во прилог на изведувачот, работите ќе завршат и пред предвидениот рок од 9 месеци.