Локалната самоуправа Неготино во рамките на одбележување на Светскиот ден на ромите – 8ми април, а во соработка со претставници на ромската заедница од општината ќе организира неколку настани со кој ќе биде одбележан овој ден. Во рамките на програмските активности ќе биде организиран турнир во мал фудбал на кој учество ќе земат екипи од неколку општини, а исто така ќе биде организиран и концерт на ромска музика со настап на музичка група. Настаните ќе бидат комплетно финансирани и поддржани од Општина Неготино, а во организацијата на истите ќе бидат вклучени и претставници на ромската заедница во општина Неготино.

   Женската екипа на „Виденбрук“ од Германија и машката екипа на „Вардар“ од Неготино се победници во своите категории во рамките на дводневниот  меѓународен турнир во ракомет кој во изминатите два дена се одржуваше во Неготино. Инаку, и во машка и во женска конкуренција настапија по 4 екипи и тоа во женска првата и втората екипа на Струма од Струмица, Вардар од Неготино и Виденбрук од Германија, додека во машка конкуренција играа тимовите на Астраион од Струмица, Виденбрук од Германија, Беса фамилија од Косово и Вардар од Неготино. По завршувањето на турнирот беа прогласени и најдобрите поединци во двете категории, а наградите им ги врачи градоначалникот на општина Неготино Ванчо Апостолов.

Поволната поддршка што ја дава Владата на Република Македонија за проектот „Купи куќа за млади“ е олеснување за граѓаните во плаќањето на ратите од кредитот или во покривањето на учеството за обезбедување на сопствен дом, а тоа со овие два модели го прави примамлив овој проект за младите, што пак резултираше со голем интерес кај граѓаните на општина Неготино кои масовно дојдоа во салата на локалната самоуправа да ја проследат презентацијата за проектот „Купи куќа за млади“. Имено, проектот „Купи куќа за млади“ нуди избор на еден од двата модела со кои Владата на РМ преку неповратни средства им помага на младите да ја отплаќаат ратата или го плаќа учеството за станбен кредит за купување, изградба, надградба или доградба на куќа. Со проектот „Купи куќа за млади“ под исклучително поволни услови им се овозможува на младите до 35 години да си го решат станбеното прашање и да дојдат до свој дом или куќа. На презентацијата што ја извршија претставници на Министерството за финансии и локалната самоуправа беа претставени моделите преку кои заинтересираните можат да аплицираат до банките, во Неготино 3, за добивање средства за започнување со обезбедување сопствен дом.