Територијалната противпожарна единица од Неготино и Општинскиот противпожарен сојуз апелираат до граѓаните со оглед на фактот што настапува летниот период, а започнуваат и жетвените активности, да ги преземат сите неопходни мерки (заштитни и законски) како не би дошло до настанување на пожари. Притоа, се даваат упатства да не се пали оган на отворено, да не се фрлаат догорчиња од цигари, да не се палат стрништа, да не се дозволи деца да си играат со запалливи материјали-моменти кои се најчести причинители за настанување на пожари. Со преземањето на препорачаните активности, сите ќе допринесеме да нема пожари и да не доаѓа до уништување на амтеријални добра и загрозување на човечки животи.

   Лесна механизација која во прво време работи на расчистување на просторот, веќе неколку денови е присутна на терен, што пак претставува официјален старт на градежните работи во Индустриската зона „Неготино“ која е сместена во близина на Црвени Брегови, со напомена дека веќе од почетокот на наредната недела инвеститорот најавува интензивирање на активностите и воведување во работа и на тешка механизација. Станува збор за Индустриската зона „Неготино“ која се протега на простор од околу 25 хектари и на која на јавно наддавање беа продадени сите 17 понудени за продажба градежни парцели. Инвеститорот во разговор со градоначалникот на општина Неготино Ванчо Апостолов потенцирал дека градежните работи ќе се одвиваат во континуитет се до коплетното оформување на инфраструктурата и изградбата на предвидените објекти.

   По повод 75 годишнината од смртта на македонскиот поет и револуционер Николка Јонков Вапцаров во Големата сала на Собранието на Општина Неготино во понеделник 29 мај со почеток од 19 часот ќе биде изведена монодрамата “Песни за татковината” на македонскиот актер Петар Темелковски. Реализацијата на овој проект со кој се одбележува важна годишнина од македонската историја е поддржана од Министерството за култура на Република Македонија и Општина Неготино. Техничката реализација е на велешкиот театар Јордан Хаџи Константинов - Џинот.

   Со подарување на автобиографската книга „Патот кон успехот“ на најпознатиот македонски боди билдер Тоше Зафиров започна денешниот прием во кабинетот на градоначалникот на општина Неготино Ванчо Апостолов за брачниот пар Зафирови. Поводот за средбата беше одличниот успех што го постигна сопругата на Тоше, Габриела, на неодамна одржаното Европско првенство во боди билдинг и фитнес на кое во категоријата фитнес Габриела Зафирова стана првак на Европа и се закити со златен медал во мошне силна конкуренција од над 170 натпреварувачи од повеќе европски земји. Нејзиниот животен сопатник и освојувач на бројни медали, пехари и признанија во светски рамки Тоше Зафиров го запозна градоначалникот дека и официјално станал интернационален судија кој ќе суди на врвните европски и светски натпреварувања во боди билдинг и фитнес. Градоначалникот Апостолов им честиташе на брачниот пат Зафирови на извонредните успеси што ги постигнуваат додавајќи дека во општина Неготино во изминатите 4 години се изградени и ставени во функција голем број на спортски објекти и терени кои се основен предуслов за развој на спортот во неготинска општина, што пак претставува основа за добра работа со младите таленти и нивно усовршување во повеќе спортови и создавање можност и други спортисти од нашата општина да постигнуваат завидни резултати со кои ќе бидат горди и самите тие, но и градот Неготино од каде потекнуваат.

   Во организација на Територијалната противпожарна единица од Неготино и Општинскиот противпожарен сојуз со одржување на показна вежба во просториите на Основното музичко училиште „Владимир Аесовски“ беше одбележан 20-ти мај –Денот на пожарникарите. Командирот на ТППЕ-Неготино Иле Илиев информираше дека во показната вежба се вклучија неготинските пожарникари со луѓе и опрема, а со асистенција на 3 доброволни противпожарни друштва од Долни Дисан, Демир Капија и Неготино. При реализирањето на вежбата, се дјствуваше во услови на настанат пожар во училиштето со евакуација на учениците и вработените. Директорката Менка Богоевска активноста ја оцени за успешна и рече дека стекнатите искуства ќе им бидат од корист и на учениците и на вработените.