Трговското друштво „Дуки Дасо“ ДООЕЛ Неготино е добитник на највисоката општинска награда „8-ми Ноември“  која се доделува по повод Денот на ослободувањето на градот. Пред присутните на свечената седница одлуката ја презентираше претседателот на Советот Диме Витанов, а наградата и признанијата на добитниците им ги врачи градоначалникот на општина Неготино Тони Делков. Покрај осмоноемвриската награда, беа доделени и 5 признанија кои им беа врачени на Илија Цветковски-филмски работник, Атанас Николов-атлетичар маратонец, Ракометниот клуб Вардар од Неготино, Ленче Лазова-крводарител и Ангела Глигорова-научен истражувач.

   На денот кога општина Неготино прославува 73 години слободно живеење, се одржа свечена седница на општинскиот Совет која ја отвори и присутните ги поздрави претседателот Диме Витанов кој како прв меѓу еднаквите ги повика сите советници да работат на носење заеднички одлуки, заклучоци, предлози и решенија за доброто на граѓаните на општината. Пригоден говор по повод празникот на општината 8-ми Ноември имаше градоначалникот на општина Неготино Тони Делков кој потенцираше дека за време на мандатот максимално ќе се труди и посветено ќе работи на остварување на проектите ветени во неговата Програма со која ја доби довербата на граѓаните на локалните избори. Делков рече дека очекува поддршка од Владата на РМ и домашни и меѓународни финансиски организации и дека приоритет ќе му биде решавањето на проблемот со водоснабдувањето. За таа цел, според градоначалникот, по спроведената ревизија на досега реализираните проекти, ќе се пристапи кон поставување приклучоци до домаќинствата кои живеат на улиците каде што водоводната мреже е реконструирана, а најави и реконструкција на мрежата на нови 6  улици во градот и поставување нови приклучоци.Во соработка со МТСП Делков најави преземање активности за изградба на нова детска градинка, реконструкција на улици во градот и населените места, систем за подобро сервисирање на комуналните услуги, подобрување на енергетската ефикасност на територијата на цела општина, обезбедување нови места за паркирање, изградба на затворен градски пазар и соработка со младите како активен чинител во заедницата. Градоначалникот Делков најави и поефикасна соработка со бизнис заедницата, поставување водовод и канализација во Индустриската зона, продажба на парцели во зоната Дуброво-Тремник, како и реализација на бројни други проекти за подобрување на севкупните услови за живеење во општина Неготино.

   Со положување на свежо цвеќе на спомен бистите и спомениците на паднатите борци и хеорите од Народноослободителната борба и на борците кои ги изгубија животите во воените конфликти на просторите на поранешна Југославија и во Република Македонија, започнаа денешните активности со кои се одбечежува 8-ми ноември-Денот на ослободувањето на Неготино. Повеќе делегации и делегација од општина Неготино предводена од градоначалникот Тони Делков посетија повеќе локации на територијата на нашата општина каде што се лоцирани спомениците и во знак на почит и сеќавање на нивната жртва, положија букети свежо цвеќе. Исто така, букети свежо цвеќе беа положени и пред спомен бистите на загинатите борци во НОБ во паркот до зградата на општина Неготино. Како дел од денешното чествување на празникот, градоналникот Делков организираше прием за делегации кои присуствуваа на одбележувањето на празникот 8-ми Ноември.

   Во рамките на одбележувањето на Денот на ослободувањето на општина Неготино 8-ми Ноември во изложбениот салон на Музејот на град Неготино се одржа традиционалната изложба на слики создадени од ликовни уметници од неготинска општина. Во присуство на голем број љубители на ликовната уметност, изложбата за отворена ја прогласи претседателот на Советот на општина Неготино Диме Витанов кој упати благодарност до сите уметници кои со свои дела ја збогатија оваа изложба и уште еднаш покажаа и докажаа дека Неготино има ликовни уметници и нивни дела со кои може да се гордее и изрази надеж дека нивниот број од година во година се повеќе ќе се зголемува, а посетителите ќе имаат можност да ги разгледуваат и уживаат во нивните слики. Организаторот на сите учесници на изложбата во знак на благодарност за нивното учество им додели пригодни подароци.