На деновиве одржаната конститутивна седница на Советот за развој на Вардарскиот регион градоначалниците од 9 општини, меѓу кои и градоначалникот на општина Неготино Тони Делков, ги поставија двата приоритети за реализација во наредниот период. Изградба на регионална фабрика за третман на цврст отпад и изградба на регионален центар за третман на бездомни кучиња се предлозите кои беа едногласно усвоени од присутните градоначалници. Тие се согласија дека пред нив е период во кој треба многу да се работи за подобрување на животот на сите граѓани, а како приоритети кои треба да се решат час поскоро се изградба на регионална фабрика за третман на цврст комунален отпад со неколку претоварни станици и решавање на проблемот со кој се соочуваат сите општини-изградба на регионален центар за третман на бездомни кучиња. Инаку, во Вардарскиот плански регион велгуваат општините Велес, Кавадарци, Неготино, Свети Николе, Лозово, Чашка, Росоман, Градско и Демир Капија.

  Посакувајќи им на сите учесници да го дадат најдоброто од себе и да остварат што е можно подобар пласман, градоначалникот на општина Неготино Тони Делков го прогласи за отворен 33-иот по ред регионален натпревар од областа на противпожарната заштита на кој учество зедоа ученици од 8 општини-Битола, Крушево, Валандово, Прилеп, Кавадарци, Гевгелија, Велес и Неготино. Самиот квиз натпревар се одржа во исклучително силна конкуренција и секој еден учесник мораше да го даде максимумот знаење и вештини за да оствари најдобар резултат. Како што беше истакнато, најдобропласираните екипи од регионалниот се стекнуваат со право  на учество на републичкиот натпревар на кој ќе се натпреваруваат најдорбите екипи од училиштата од цела Македонија. За регуларноста на натпреварувањето и за бодувањето се грижеше посебно формирана комисија составена од стручни лица од областа на противпожарната заштита. Инаку, предходно во фоајето на Центарот за култура беше отворена изложба на ликовни цртежи на тема противпожарна заштита.

  На јавниот повик за финансирање на спортските клубови од Буџетот на Општина Неготино за 2018-та година кој беше објавен минатата недела, одговорија 16 спортски колективи од општината, кои доставија план на активности и финансиска програма за наредната година. Вкупниот износ на побараните средства ќе биде дел од предлог – програмата за спорт, а по изгласувањето на истата спортските клубови од општината на почетокот на новата календарска година според точно утврдени критериуми од Советот на општината ќе добијат финансиски средства. Овие финансиски средства ќе им овозможат на спортските клубови континуирана и стабилна работа, со цел постигнување на подобри резултати и развој на спортот во Општина Неготино.

  Секој работен петок ќе биде отворен ден за граѓаните на општина Неготино кои имаат потреба од остварување средба и контакт со градоначалникот на општина Неготино Тони Делков. Исклучок од ова правило ќе биде само денот кога поради  обврски градоначалникот ќе биде службено отсутен. Сите заинтересирани граѓани за прием во кабинетот на Делков треба да се пријават во текот на неделата и да пополнат формулар кој ќе го добијат на пријавницата на влезот во зградата на општина Неготино, како предуслов за добивање реден број за прием. Градоначалникот ќе ги прими сите пријавени граѓани на средби со него и доколку покренатите прашања се во негови ингеренции тој директно ќе разговара со посетителите, а ако е потребно, граѓаните ќе бидат препратени подетални информации да добијат кај стручните служби при локалната самоуправа.

   „Граѓаните се тие кои најдобро ги познаваат проблемите во нивното село, урбана заедница, населба, маало, улица и слично и токму со цел да го слушнеме нивното мислење ги организиравме средбите со жителите на месните заедници во селата и 9-те урбани заедници во градот. Наидовме на одличен прием, масовно присуство на средбите и слушнавме квалитетни и конструктивни предлози, мислења и забелешки. Тоа пак, верувам дека ќе придонесе за јакнење на довербата на релација градоначалник-Совет на општина-локална администрација-граѓани на општина Неготино“-истакна во изјава за медиумите градоначалникот на општина Неготино Тони Делков по завршување на сите предвидени средби. Според градоначалникот, граѓаните најголем интерес пројавиле за решавање на проблемот со водоснабдувањето, уредување на патната инфраструктура, подобрување на комуналната хигиена во градот и населените места, уличното осветлување, а неизбежни се и индивидуалните барања од граѓаните за решавање на одреден проблем. Според Делков, сите предлози ќе бидат разгледани и анализирани и дел од нив ќе се најдат во годишната Програма за работа на општина Неготино и општинскиот Буџет за наредната 2018-та година, додавајќи уште еднаш дека ваквите средби ќе бидат правило, а не исклучок.