Со почеток од 16,00 часот Советот на општина Неготино ќе ја одржи 8-та по ред седница на која на дневен ред ќе се најдат 17 точки за разгледување. Меѓу другото, советниците ќе расправаат по предлог решенијата за годишниот план за вработување на библиотеката Страшо Пинџур, основното училиште Гоце Делчев, музичкото училиште Владимир Арсовски, средното училиште Св. Кирил и Методиј и извештајот за работа на Отворениот граѓански универзитет за доживотно учење Неготино. На дневен ред ќе се најдат и предлог-одлуки од областа на урбанизмот, предлог-решенија за финансиска поддршка на клубовите и здруженијата од нашата општина, предлог-заклучокот за усвојување на извештајот за извршувањето на програмите на општината за минатата година, како и заклучокот за усвојување на годишната сметка на Буџетот на општина Неготино за 2017-та година.

  „Вие сте луѓе кои твореле во минатото и кои се уште сте активни во спроведувањето на дел од активностите кои ги организира локалната самоуправа и вие самите, како на пример „Неделата на виното“ и други настани, па токму затоа го заслужувате целосно моето и вниманието на општината“-истакна во пригодното обраќање градоначалникот на општина Неготино Тони Делков на средбата со активистките на здружението „Анри Динан“. Првиот човек на општина Неготино ја искористи оваа средба на 17 активистки да им додели пригодни подароци во знак на внимание по повод Денот на жената, притоа испраќајќи порака дека младите треба да учат и земаат пример од постарите сограѓани. Претставничките на „Анри Динан“ го запознаа градоначалникот Делков со тековните и идните планирани активности и упатија покана до него како градоначалник да присуствува на дел од проектите што ги реализираат. Исто така, пригодни подароци им беа доделени и на дел од членките на Здружението на пензионери од Неготино.

Почитувани припаднички на понежниот пол од општина Неготино ! Драги сограѓанки !  Денеска е 8-ми март, Меѓународниот ден на жените кој се празнува секоја година, па по тој повод од мое лично име како градоначалник на општина Неготино и од име на локалната самоуправа на сите припаднички на понежниот пол од нашата општина и пошироко им го честитам празникот со искрени желби за здравје, среќа и личен просперитет. Празнувањето на овој ден е и симбол на рамноправноста и слободата помеѓу двата пола. Токму затоа, Ви порачувам да бидете храбри, упорни и истрајни, полни со самодоверба и позитивни. Бидете столб на семејството и домот. Сакајте ги, почитувајте ги и честитајте им го денешниот ден на вашите најмили со што ќе им го покажете вашето внимание, а истовремено ќе им го направите денот уште поубав и повесел. Бидете здрави и живи и нека е за многу години празникот 8-ми март!

   Во организација на Федерацијата на училишен спорт на Република Македонија и во соработка со двете основни училишта од градот, во Неготино престојуваше штафетната трка за мир која не е од натпреварувачки карактер и има за цел промоција на меѓународниот мир. Подавајќи го факелот од рака во рака трката која поминува низ многу држави на различни континенти денеска помина по улиците на Неготино и накратко се задржа во училишниот двор на ООУ„Гоце Делчев“ каде што беше организиран пречек проследен со мала културна свеченост на која присуствуваа градоначалникот на општина Неготино Тони Делков и делегација на локалната самоуправа, пратеникот Ристе Ташев, директорот на училиштето Петар Мантев и други учесници во трката и заинтересирани граѓани. Организаторите информираа дека Трката за мир по 31-ви пат е присутна во Македонија, истата се одржува на 2 години, посетува 49 земји и претрчува 24.000 километри. Во пригодното обраќање градоначалникот Делков ја истакна неговата и интенцијата на општина Неготино за создавање услови за реализација на спортски активности со кои кај секој поединец ќе дојде до подобрување на моторните способности и физичката подготвеност, поттикнување за водење на активен и здрав живот на младите и формирање здрави животни навики, се во духот на максимата „во здраво тело-здрав дух“. Во знак на благодарност за гостопримливоста, организаторите на трката на градоначалникот Делков му врачија пригоден подарок.

    Со положување на свежо цвеќе на спомен-бистата на патронот на училиштето од страна на претставници на училиштето и други делегации, меѓу кои и делегација на општина Неготино предводена од градоначалникот Тони Делков, беше одбележан патрониот празник на Основното општинско училиште „Страшо Пинџур“ од Неготино. Пригодно обраќање пред присутните за значењето на празникот и тековното функционирање на оваа образовна установа имаше директорот на училиштето Сашо Ѓорѓиев, а целиот настан беше проследен со поголем број на активности. Така, учениците со помош на своите наставници подготвија богата програма со која се претставија пред многубројните гости, а беа доделени и признанија на ученици.