Во петок, 30ти Март, со почеток во 13 часот, во просториите на Општина Неготино ќе се одржи презентација на Проектот на УСАИД за развој на деловниот екосистем пред претставници од приватниот сектор во општината. Градоначалникот Делков ќе ја отвори средбата со поздравен говор за соработката на Општина Неготино со приватниот сектор, а потоа претставниците од Проектот ќе ги презентираат нивните активности за поддршка на микро, малите и средните претпријатија. Средбата ќе заврши соотворена дискусијата за потребите на приватниот сектор во Неготино и можностите за соработка со Проектот.
Проектот на УСАИД за развој на деловниот екосистем, започнат во ноември 2017 година,работи на зголемување на конкурентноста на микро, малите и средните претпријатија преку зајакнување на деловните услуги, финансирањето и пазарните врски. Целта на Проектот е зголемување на продуктивноста и вработувањата во приватниот сектор. Проектот, во своето четиригодишно делување, ќе се фокусира на три заемно поврзани компоненти:
1.    Подобрување на услугите на организациите за деловна поддршка на микро, малите и средните претпријатија;
2.    Подобрување на пристапот до финансии на претпријатијата;
3.    Инвестиции на водечки фирми во развој на работната сила и синџирот на снабдување.
Активностите на Проектот, како и можностите за вклучување на локалните компании, ќе бидат детално објаснети на средбата.

   Синоќа (26 март) во преполната сала на НУ Центар за култура “Ацо Ѓорчев” во Неготино актерите од кавадаречкиот театар “Иван Мазов Климе” ја одиграа урнебесната комедија “Стјуардеси” и до солзи ја насмеаа неготинската публика, во рамки на прославата на Светскиот ден на театарот 27 март. Инаку, пред одличната изведба на сцената на Центарот за култура “Ацо Ѓорчев” во Неготино, претставата „Стјуардеси“ на кавадаречкиот театар забележа осум распродадени репризи на матичната сцена во Кавадарци и повеќе успешни гостувања меѓу кои позначајни се изведбите во Гостивар и во Скопје (во Дом на АРМ).
Театарската недела во Неготино продолжува во четврток (29 март) со претставата “Бегај еве ја жена ти 2” во режија на еминентното име на македонската театарска сцена Коле Ангеловски, а во изведба на кумановскиот театар “Трајко Прокопиев”. Почетокот на претставата е закажан за во 20.00 часот, а билетите за претставата по цена од 50 денари можат да се набават на билетарата во Центарот за култура “Ацо Ѓорчев”.
Двете претстави се финансирани од општина Неготино, со цел нашиот град да биде дел од глобалната прослава на Светскиот ден на театарот, кој што оваа година масовно се одбележува насекаде во светот.

    По повод одбележувањето на Светскиот ден на театарот, со финансиска поддршка на општина Неготино, во Центарот за култура “Ацо Ѓорчев” љубителите на театарот од нашиот град следната недела ќе имаат можност да проследат две одлични театрски комедии во изведба на театрите од Кавадарци и Куманово.
Најпрво во понеделник (26 март) на сцената во Центарот за култура “Ацо Ѓорчев” ќе биде одиграна претставата “Стјуардеси” во изведба на кавадаречкиот театар. Режисер на претставата е Диме Коцевски на текст на Марк Камолети. Покрај режисерската улога, Коцевски ќе понесе и голем товар од актерски аспект, а покрај него во претставата играат уште и Видан Станоев, Валентина Ѓорѓиева, Зорица Стефковска, Ребека Малиминовска, Никола Деков и Костадин Прокопов. Урнебесната комедија на Марк Камолети е еден од најпоставуваните текстови ширум светот, а уникатното режисерско гледање на Диме Коцевски и дава една сосема нова свежина, и прави чувство дека гледате сосема различна претстава која надополнета со неочекуваните сцени, специјалните гости и тиквешкиот дијалект кој провејува низ дел од сцените, засмејува до солзи. Почетокот на претставата е закажан за во 18.30 часот, а билетите по цена од 50 денари ќе се продаваат на билетарата на Центарот за култура “Ацо Ѓорчев”.
Претставата Бегај, еве ја жена ти (Па не баш) на кумановскиот театар “Трајко Прокопиев” во режија на Коле Ангеловски, на текст на Реј Куни неготинската публика ќе може да ја проследи во четврток 29 март со почеток во 20 часот во Центарот за култура “Ацо Ѓорчев”. Во претстават играат Горан Илиќ, Дубравка Киселички, Владо Дојчиновски, Кети Дончевска Илиќ, Александра Михајловска, Илија Струмениковски и давид Илиќ. Режисерот Коле Ангеловски во својата адаптација посегнува по англискиот хумор од текстот на Куни, давајќи му домашен шмек, локална географија и дијалект и ткае возбудлива и современа приказна за луѓе од нашето секојдневие кои случајноста ги става во мноштво невозможни и урнебесни ситуации, со низа неочекувани пресврти.
Општина Неготино ги поканува сите љубители на театарот да не ја пропуштат оваа одлична можност за театарско уживање и дружење со извонредните актери од двата театри.

   Врз основа на усвоениот Детален урбанистички план Неготино за Урбана заедница 5, Урбан блок 5.1 КО Неготино од страна на Советот на општина Неготино, локалната самоуправа Неготино ја информира јавноста дека е објавена Објава за отуѓување на градежно земјиште сопственост на Република Македонија по пат на јавно наддавање, односно објавена е продажба на 4 градежни парцели со намена А1 за индивидуално домување. Станува збор за парцели со поединечна површина од 257 м2, потоа 252 м2, 376 и последната парцела е со површина од 437 м2, а сите заинтересирани физички и правни лица за нивно купување поднесуваат пријава за учество на јавното наддавање по електронски пат преку информацискиот систем поставен на интернет страницата www.gradezno-zemjiste.mk со доставување на банкарска гаранција. Почетната цена по метар квадратен за сите 4 парцели понудени на продажба изнесува 61 денар, а јавното наддавање ќе се одржи на 13-ти април, оваа година, со почеток од 10, 11, 12 и 13 часот за секоја парцела поединечно и истото ќе трае по 15 минути. Подетални информации за продажбата на парцелите сите заинтерсирани правни и физички лица можат да добијат на официјалната веб страна на општина Неготино www.negotino.gov.mk или кај стручните служби во локалната самоуправа.

   Ниту неповолните временски услови не беа пречка учениците и вработените во СОУ„Св. Кирил и Методиј“ во соработка со вработените во ЈП„Комуналец“, а во координација со градоначалникот на општина Неготино Тони Делков,  да ја реализираат големата еко-акција која се спроведе во кругот на неготинското средно училиште. Како што информираше директорката на училиштето Менче Зафирова станува збор за активност која се одвива согласно годишната Програма за работа на училиштето, при што беше извршено засадување на 400 чемпреси обезбедени од ЈП„Македонски шуми“  кои се поставени во форма на заштитна ограда на училишниот двор, а паралелно вработени во неготински Комуналец со работна рака и поддршка од механизација извршија расчистување на сметот од училишниот двор и поблиската околина. Локалната самоуправа го обезбеди неопходниот геодетски премер кој ќе претставува основа за одвивање на идни вакви и слични активности, бидејќи според директорката Зафирова, акцииите за уредување на просторот околу училиштето ќе бидат присутни и во иднина, со намера за оформување на нова парковска површина, поставување урбана опрема и хортикултурно уредување на просторот.